Maamulka Gobalka Banaadir ayaa xalay Magaalada Muqdisho ka bilaabay wejiga labaad Bilic soo celinta Caasimadda, kadib markii qaar kamid ah waddooyinka ay xireen biyo farabadan oo ka hooray roobkii da’ay.
Agaasimaha Guud ee Waaxda Nadaafada Gobolka Sharmaake Cadow Tuuryare ayaa waxaa uu sheegya in laga soo gudbay wejiga koowaad ee Bilic soo celinta, loona gudbay wejiga labaad oo ah sidii waddooyinka looga qaadi lahaa carro taalla iyo qashin soo raacay biyaha roobabkii da’ay.
Sidoo kale Agaasime Sharmaake Caddow ayaa shacabka Gobolka kunool ka Codsaday in Maamulka ay kala shaqeeyaan sidii loo celin lahaa Bilic Magaalada Muqdisho, wuxuuna sheegay in dadka qaarkood ay yihiin kuwa aan xil iska saarin Bilicda.
Isaga oo sii hadlaayay Agaasime Tuuryare ayuu tilmaamay in Maamulka Gobolka Banaadir uu tallaabo sharci ah ka qaadi doono dadka mar kasta waddooyinka ku shuba qashinka, isagoo xusay in dadkaas ay la kulmi doonaan ciqaab isugu jirta Ganaax iyo xarig.
Ugu dambeyn Sharmaake Caddow Tuuryare ayaa xusay in dadka ku Ganacsada hareeraha Laamiyada looga baahan yahay inay ka shaqeeyaan bilicda, isla markaana cidii fulin weyda amarkaas Maamulka uu ruqsada Ganacsi uu kala noqo doono.