Madaxweynaha Jamhuuriyadda Federaalka Soomaaliya Maxamed Cabdullaahi Farmaajo ayaa u magacaabay Cabdulqaadir Maxamed Maxamuud Guddoomiye Kuxigeenka Maamulka iyo Maaliyadda Gobolka Banaadir, ahna ku-xigeenka 1-aad ee Guddoomiyaha Gobolka iyo Duqa magaalada Muqdisho, halka Cali Cabdi Wardheere loo magacaabay Ku Xigeenka Amniga iyo Siyaasadda.
Madaxweynaha oo sidoo kale tixraacaya, talo soojeedinta Golaha Xukuumadda iyo qorshaha Ra’iisul Wasaaraha ee la xiriira dardar gelinta howlaha soocelinta bilicda Caasimadda ayaa u magacaabay Mudane Faarax Cabdi Diini Guddoomiye Kuxigeenka Howlaha Guud ee Gobolka Banaadir, halka Mudane Xiireey Axmed Rooble loo magacaabay Xoghayaha Guud ee Gobolka Banaadir.
Madaxweynaha ayaa ku adkeeyey dhammaan masuuliyiintan uu magacaabay in ay degdeg u hirgeliyaan qorshaha hormarineed ee laga sugayo, uguna adeegaan shacabka Soomaaliyeed ee Gobolka Banaadir si daacadnimo iyo waddaniyad leh, wuxuuna ku ammaanay gudoomiyeyaashii hore ee xilalkan soo hayey wakhtiga ay u hureen u adeegidda shacabkooda iyo dalkooda.
Cali Cabdi Wardheere (Cali yare) ayaa bedelaya Guddoomiye ku-xigeenkii amniga iyo siyaasadda Maamulka Gobolka Banaadir Maxamed Cabdullaahi Maxamed (Tuulax) oo in muddo ah haayay.
Sidoo kale Is-bedelka uu Madaxweyne Farmaajo ku sameeyay Gobolka Banaadir ayaa waxay saameysay labo Guddoomiye Ku-xigeen oo muddo lix bilood xilka hayay, kuwaasoo kala ahaa Axmed Iimaan oo ahaa Guddoomiye Ku-xigeenka Maaliyadda iyo Cumar Cali Cabdi oo ahaa Ku-xigeenka howlaha Guud.
