Faah faahinno dheeraad ah aya laga helayaa dagaal xooggan oo maanta ka dhacay Gobolka Galgaduud, waxaana lasoo sheegayaa khasaare kala duwan oo ka dhashay dagaalkaasi Saaka ilaa maanta ka socday Gobolkaasi.
Wararkii ugu dambeeyay ayaa sheegaya in dagaalku uu hadda Qaboobay, ayna Ciidanka Dowladda Soomaaliya la wereegeen Goobihii lagu dagaalamay.
Dagaalka oo dhowr jiho ka billawday ayaa Saraakiisha Ciidanka hoggaaminaysa waxaa ay sheegeen in ay guulo waa weyn ka gaareen dagaalka maanta ka dhacay degaanka Bulacle iyo degaanno kale oo hoostaga, waxaana dagaal xooggiisu ka qarxay Tuulooyin hoostaga Bulacle.
Ciidanka dowladda ayaa dad goobjoogayaal ah waxaa ay sheegeen in weerar ku qaadeen degaanno dhaca Bariga dhuusamareeb oo ay ku sugnaayeen Dagaalamayasha Al-shabaab, iyadoo wixii intaas ka dambeeyay uu dagaal xooggani qarxay.
Warar la helayo ayaa waxaa ay sheegayaan in degaanadii lagu dagaalamay ay ku sugan yihiin Ciidanka Dowladda Soomaaliya, waxaana saraakiisha Ciidanka horkacaysa ay sheegeen in ay dagaalkaasi ku dileen daagaalamayaal ka tirsan Al-shabaab, balse ma sheegin khasaaraha kasoo gaaray dagaalkaasi Ciidanka Dowladda.
