Ciidanka Xoogga dalka gaar ahaan  guutada 5aad qeybta 27-aad ayaa saacadihii lasoo dhaafay howlgal ballaaran ka sameeyay deegaano ka tirsan Gobolka Hiiraan oo la sheegay inay ku sugnaayeen Alshabaab.
Abaanduulaha guutada 5-aad ee ciidanka xoogga dalka Korneyl Cabdullaahi Barre oo warbaahinta la hadlay ayaa waxaa uu sheegay in howlgalka Ciidanka la sameeyay inta u dhexeeysa degmooyinka Maxaas iyo Baladweyne ee Hiiraan.
Ujeedka howlgalka ayuu Abaanduule Cabdullaahi Barre ku sheegay inuu ahaa sidii Al-shabaab looga saari lahaa deegaanada ay kaga sugan yihiin Gobolka Hiiraan gaar ahaan kuwa xiga dhinaca baadiyaha fog-fog.
Abaanduulaha guutada 5-aad ayaa tilmaamay in kaliya Al-shabaab aysan la dagaalameyn balse ay sida Alshabaab ula dagaalami doonaan burcadda Isbaarooyinka wadada u dhigta shacabaka ee dhaca u geysta, isagoo uga digay, qofkii lagu qabtana ay ka qaadi doonaan tallaabo sharciga waafaqsan.
Ciidanka Xoogga dalka qeybta 27 ayaa dhowr jeer howlgalo kala oo dhan ah Al-shabaab ka sameeyay Gobolka Hiiraan, waxaana halkaas dhinacyada ku dhexmaray dagaalo geystya Khasaaro kala duwan, sidoo kalena Al-shabaab ay qaraxyo xoogan ka fulisay Gobolka.
