Askari ka tirsan Ciidanka Dowladda Federaalka ee ku sugan degmada Matabaan ee Gobolka Hiiraan ayaa dil bareer u ah geystay qof shacab ah oo kamid ahaa dadka deegaanka degmadaas.
Dilka loo geystay qofka shacabka oo Nin ahaa ayaa ka dambeeyay, kadib markii Askariga iyo qofka la dilay uu soo kala dhex-galay muran kooban oo aan faah faahin laga helin, hayeeshee Askariga uu carooday, kadibna uu rasaas ku furay Ninkaas.
Saraakiil katirsan Taliska Guutada 5-aad Qeybta 27-aad Ciidamada Xooga Dalka Soomaaliya ayaa gaaray degmada Matabaan ee Gobolka Hiiraan, iyagoona kulan la qaatay qoyska iyo Ehelada Ninka laga dilay.
Abaanduulaha Taliska Guutada 5-aad Qeybta 27-aad oo hoggaaminayay Ciidanka tegay degmada Matabaan ayaa la sheegay inuu ku guuleystay in qoyska Ninka laga dilay uu ku qanciyo in dilkaas uusan isku bedelin aano qabiil, wax kastana la xalin doono.
Sidoo kale Taliyaha Booliska degmada Matabaan ayaa sheegay in si deg deg ah laamaha amniga degmada ay gacanta ugu soo dhigi doonaan Askarii ka dambeeyay dilkii halkaas ka dhacay, isla markaana la bilbaabay howlgal lagu raadinayo Askariga.
Deegaano ka tirsan Gobolka Hiiraan ayaa waxaa xiliyada qaarkood ka dhaca dilal la xiriira aano qabiil oo markii dambe isku bedela dagaal beeleedyo dhexmaraya maleeshiyaad hubeysan oo wada dega Gobolka Hiiraan.
