Taliska Ciidanka Xoogga dalka Soomaaliyeed ayaa faah faahin ka bixiyay dagaal xoogan oo gelinkii dambe ee shalay Ciidanka dowladda, kuwa koonfur Galbeed iyo Al-shabaab ku dhexmaray deegaano ka tirsan Gobolka Baay.
Taliyaha Ciidanka Xoogga dalka Gen. Odawaa Yuusuf Raage oo la hadlay warbaahinta dowladda ayaa u sheegay in Ciidanka dowladda ay weerar qorsheysan ku qaadeen deegaan lagu magacaabo Mitir oo 11KM u jira degmada Diinsoor, kadibna uu dhacay dagaal saacado badan qaatay.
Waxaa uu sheegay Taliye Oadwaa in dagaalka uu ka dhashay Khasaaro dhimasho iyo dhaawac ah oo la gaarsiiyay Al-shabaab, iyagoona xusay in weerarka lagu dilay 19 dagaalame oo ka tirsan Al-shabaab, sidoo kalena gacanta lagu dhigay laba xubin.
Isaga oo sii hadlaayay Taliyaha Ciidanka Xoogga ayaa waxaa uu tilmaamay in la burburiyay goob Shabaab ay isku aruursanayeen, waa sida uu hadalka u dhigay Odawaa oo la hadlaayay warbaahinta dowladda.
Warar madaxa banaan oo laga helayo deegaanka uu dagaalka shalay ka dhacay ayaa sheegaya in Khasaaro dhimasho iyo dhaawac ah uu soo kala gaaray labada dhinac ee dagaalamay, In kastoo aan si rasmi ah loo ogeyn inta uu la egyahay.
Dagaalkaaas ka dhacay gobolka Baay ayaa waxaa uu kusoo aadayaa, xili shalay Ciidanka DANAB howlgal qorsheysan ka sameeyeen deegaanka Leego ee Gobolka Shabeellaha Hoose, halkaas oo Saraakiisha dowladda sheegeen in lagu dilay dagaalamayaal ka tirsan Al-shabaab.