Ciidanka Faransiiska ee qaybta ka ahaa la dagaalanka Burcad-badeedda ayaa waxaa lagala wareegay Xilka Hoggaaminta ee Taliska Ciiddanka ee CTF 150, waxaana la shegay in hadda wixii ka danbeeya ay shaqadaas si toos ah ula wareegi doonaan Sucuudigu.
Howlgalka ayaa ah sidii loola dagaalami lahaa qowlaysatada Burcad-badeedda ah ee afduubyada ka gaysta xeebaha Soomaaliya, waxaana ay kormeer iyo baacsi ay ku sameeyaan   Maraakiibta iyo Doonyaha loogaa shakiyey inay qeyb ka yihiin Kooxaha Burcad-baddeedda ama ay mararka qaar Tahriibinaya Hubka iyo waxyaabaha kale ee sharci darrada ah.
Taliska ka howlgala Xeebaha Soomaaliya ee la dagaalama Burcad-badeedda ayaa 4-tii bilba waxaa lagu sameeyaa isbeddel waxaana marba taliska la wareega dal cusub oo hoggaanka Ciiddanka Badda ee Caalamiga ee Xeebaha Somalia lagu wareejiyaa.
Tan iyo wixii ka danbeeyay sandkii 2008-dii waxaa soo badanayay afduubyada ka dhaca xeebaha Soomaaliya, waxaa tan iyo xiligaas soo shaac baxay kooxo qowlaysato ah oo madax-furasho ka qaata dadka ay gacanta ku dhigaan, waxana xusid mudan in la sameeyay ciidamo heer caalami ah kuwaas oo ka howl gala biyaha Soomaaliya, howlgalka Ciiddanka Badda ee Caalamiga ee Xeebaha Somalia ayaa fadhigiisa ugu weyni waxaa uu yahay dalka Baxrayn.
