Guddoomiyihii hore ee Gobolka Banaadir Gen. Xasan Maxamed Xuseen Muungaab ayaa ka hadlay Go’aankii Maanta lagu ansixiyay xeerka Metelaadda Gobolka Banaadir ee Golaha Aqalka sare ee dalka.
Qoraal uu soo saaray Muungaab ayaa waxaa uu ku bogaadiyay tallaabada Xildhibaanada Golaha Shacabka ay ku ansixiyeen in Gobolka Banaadir metalaad 13 xubnood ah ku yeesho Aqalka Sare ee Baarlamaanka dalka.
Waxaa uu sheegay Gen Muungaab in Arrinta metelaadda Gobolka ay tahay bilow iyo horumar ah oo mudan in lasoo dhoweeyo, isagoo Baarlamaanka Federaalka ugu baaqay inuu si Deg-deg ah u gudda-galo dhaqan gelinta qodobka muhiimadda weyn leh ee Maqaamka Caasimadda Muqdisho.
Qoraalka uu soo saaray Generaal Muungaab ayaa qornaa sidan:
Waxaan Baarlamaanka Federaalka Soomaaliya ku bogaadinayaa tallaabada ay qaadeen ee ay ku ansixiyeen maanta oo ay taariikhdu ahayd 27 June 2020 inuu Gobolka Banaadir metalaad 13 xubnood ah ku yeesho Aqalka Sare ee Baarlamaanka Soomaaliya.
Waa arrin bilow iyo horumar ah oo mudan in lasoo dhoweeyo, balse kuma filna, waayoo sida uu qabo qodobka 9-aad ee Dastuurka KMG ah Baarlamaanka waxaa laga sugayey Maqaamkii Muqdisho oo dhamaystiran, arrintaa oo soo jiitamaysay ku dhowaad 20 aano oo aanay Baarlamaannadii hore waxba ka qaban.
Waxaan ugu baaqayaa Baarlamaanka Federaalka inuu deg-deg u gudda galo dhaqan gelinta qodobka muhiimadda weyn leh ee Maqaamka Caasimadda Muqdisho.
