Khilaaf dhanka Aragtida Bisha Shawaal ayaa sababtay inay Dalalka Caalamka Islaamka ku kala qeybsamaan Munaasabadda Ciidul-Fitriga ee sanadkan 1441-ka Hijriyah.
Kala duwanaanshaha waxay horseeday in dalal laga sooman yahay oo la dhamaystirayo 30-ka bisha Ramadaan, halka kuwo kalena looga dhawaaqay inay maanta oo Sabti ah tahay Maalintii Koowaad ee Ciitul-Fidriga.
Markaynu eegno dalalka Carabta, waxaa la shaaciyey in 2 dal oo kaliya maanta laga ciideeyo, kuwaasi oo kala ah Somalia iyo Mauritania, sida ay shaaciyeen Wasaaradaha Awqaafta iyo Arrimaha Dibedda ee labadaasi dal.
Wasaaradda Awqaafta iyo Arrimaha Diinta ee Somalia waxay saacadihii hore ee xalay shaacisay inay Sabtida soon tahay, oo la dhamaystiri doono 30-ka bisha Ramadaan, balse, saacado kadib, 2-dii Habeenimo ee Saqdii dhexe ee xalay waxay Wasaaraddu shaacisay in la arkay bilashadda Bisha Shawaal, isla markaana ay maalinta Sabtidu tahay maalintii Koowaad ee Ciidul-fidriga.
Waddamadda Carabta badankooda maanta waa laga sooman yahay, waxaana la iclaamiyey in maalinta Axadda tahay maalinta Koowaad ee Munaasabdda Ciidul-fitriga.Ilaa 20 Waddamo Carbeed ayaa maanta laga sooman yahay, oo berrito laga ciidi doona, kuwaasi oo kala ah: Sacuudiga, Jabuuti, Imaaraadka, Qatar, Cumaan, Kuweyt, Masar, Morooko, Baxrayn, Urdun, Iraq, Lubnaan, Falastiin, Tunisia, Algeria, Syria, Yemen, Lubnaan, Libiya iyo Jersiiraddaha Komooros.
Dhinaca kale, Dalalka kale ee Islaamka maanta laga dhamaystirayo 30-ka bisha Ramadaan, isla markaana berrito laga ciidi doono waxaana dalalkaasi ka mid ah: Turkiga, Indonesia, Malaysia, Iran, Pakistan, Bangaldesh, Hindiya iyo kuwo kale.
Si kastaba ha ahaatee, Munaasabadda 3-da maalmodod ee Ciiddul-fitriga waxaa u dabaal degi doona guud ahaan dadka Muslimiinta ku nool Caalamka oo tiradooda lagu sheegay 1.8 Bilyan oo qof.