Ugu yaran 40 qof ayaa ku dhintay qarax ka dhacay Magaalada Afrin ee ku taalla waqooyi-galbeed dalka Suuriya sida ay xukumadda Turkiga sheegtay.
Barasaabka gobolka xadka Turkiga ku yaalla ee Hatay ayaa sheegay in Booyad shidaal sidday oo mareysay suuq ay dadku ku badan yihiin bam gacmeed lagu tuuray halkaasi oo uu khasaaro badan ka dhashay.
Barasaabka iyo wasiirka gaashaandhigga Turkiga ayaa qaraxaasi ku eedeeyay maleeshiyada Kurdiyiinta ee YPG. Magaalada Afrin ayaa waxaa gacanta ku haya militariga dalka Turkiga oo muddooyiinkii u dambeeyay halkaasi ku sugnaa.
Koox u doodda xuquuqda aadanaha Suuriya oo uu fadhigeedu yahay UK waxay sheegtay in goobta uu qaraxa ka dhacay ay ku dhowdahay xafiiska gobolka looga arrimiyo.
Xilliga uu qaraxa dhacayeyna dadka ugu badan ee suuqaasi ku sugan waxay ahaayeen dad iisu diyrinayey afurka soonka bisha barakeysan ee Ramadhaan kuwaasi oo suuqa ka adeeganayey.