Ra’iisul Wasaaraha Xukuumadda Federaalka Soomaaliya Xasan Cali Kheyre iyo wafdi uu hogaaminayo ayaa saakay u ambabaxay Magaalada Addis Ababa ee Caasimadda dalka Itoobiya.
Safarka Ra’iisul Wasaare Kheyre ee Addi Ababa ayaa waxaa ku wehlinayay xubno ka tirsan Golihiisa Wasiirada, waxaana la sheegay in Safarka uu ahaa mid Deg deg ah oo aan horey loo sii qorsheyn.
Warar lagu kalsoonaan karo oo aan helay ayaa sheegaya in Ujeedka safarka Ra’iisul Wasaare Xasan Cali Kheyre ee Addis Ababa uu la xiriiro Arrimo ku soo kordhay xiriirka u dhexeeya Soomaaliya iyo Itoobiya.
Sidoo kale Ilo xog-ogaal ah ayaa sheegaya in Xasan Cali Kheyre uu fariin Madaxda dowladda Itoobiya uga sido Madaxweyne Maxamed Cabdullaahi Farmaajo.
Qoraal saakay kasoo baxay Xafiiska Ra’iisul Wasaaraha Soomaaliya ayaa waxaa lagu sheegay in Kheyre uu kulamo kala duwan la qaadan doono inta halkaas uu ku sugan yahay Madaxda dowladda Itoobiya.
Si kastaba Itoobiya ayaa waxaa la sheegay in dhowaan ka carootay markii Soomaaliya taageertay qaraarkii Masar ee Jaamacadda Carabta ee ku aadanaa mowqifkeeda la xiriira biyo xireenka ay dhisatay Itoobiya, iyadoo shirkii Jaamacadda Carabta uu Soomaaliya u matalayay Wasiiru dowlaha Arrimaha Dibadda.