Dagaal u dhexeeyay Ciidanka dowladda Federaalka iyo dagaalyahano ka tirsan Al-shabaab ayaa xalay waxaa uu ka dhacay gudaha Degmada Afgooye ee Gobolka Shabeellaha Hoose.
Dagaalkaan ayaa waxa uu ka dambeeyay kadib markii rag hubeysan oo ka tirsan Al-shabaab ay weerar kusoo qaadeen Saldhig Ciidanka dowladda ay ku leeyihiin gudaha Afgooye , waxaana intaas kadib dhacay dagaal socda muddo ku dhow saacad.
Qof kamid ah dadka deegaanka oo la hadlay Radio Dalsan ayaa waxaa uu u sheegay in xalay gudaha Degmada laga maqlayay dhawaqa rasaas ay Isdhaafsanayeen Ciidanka dowladda iyo kuwa Shabaabka.
Saraakiil ka tirsan Ciidanka dowladda ayaa waxaa ay sheegeen inuu weerarkii uga yimid dhanka Al-shabaab ay iska difaaceen, isla markaana xaalada degmada saakay ay tahay mid degan.
Sidoo kale Ciidamada dowladda ayaa howlgal ka sameeyay Xaafado ka tirsan Degmada Afgooye ee Gobolka Shabeellaha Hoose, waxaana la tilmaamay inta uu socday in lagu soo qabtay tiro dad ah.
Ilaa iyo hada lama oga Khasaaraha ka dhashay dagaalkii xalay ka dhacay Afgooye ee u dhexeeyay Ciidanka dowladda Federaalka Soomaaliya iyo Al-shabaab, waxaana xusid mudan in dhowr shabaab halkaas ay weeraro kala duwan ay ka fuliyeen.