Sahankii u horeeyay oo ah Mashruuc lagu dhisayo garoonka cusub ee diyaaradaha Muqdisho ayaa maanta bilowday, kaasoo qorshuhu yahay in lagu dhiso garoon diyaaradeed cabirkiisu yahay 14KM.
Dhul xeebeed ku yaala duleedka waqooyi bari ee magaalada Muqdisho ayaa waxaa maanta kormeer ku tagay Wasiiro ka tirsan Xukuumadda, Guddoomiyaha Gobolka Banaadir, Madaxweyne kuxigeenka Hirshabeelle, Xildhibaano, Sanetor, Ganacsato, iyo Duubabka dhaqanka, si ay indha indheyn ugu sameeyaan goob la filayo in laga dhagax dhigo mashruuca dhismaha garoonka cusub ee Muqdisho International Air Port.
Goobta la sahmiyay ayaa Muqdisho u jirta ku dhowaad 35KM, waxaana dhul ahaan ay ka tirsan tahay Gobolka Shabeellaha Dhexe, waxaana ay u dhaxeysa Dekedii Ceel Macaan iyo degmada Warsheekh.
Mas’uuliyiintii booqday dhulkan loo qorsheynayo in laga dhiso garoon diyaaradeed ayaa isla qaatay inay tahay meel istiraatiijiyad ah oo ku habboon dhismo garoon diyaaradeed, marka loo eego baaxada dhulka uu ku fadhiyo, dhanka xeebta uu saaran yahay.
Garoonka Diyaaradaha Aadan Cadde ee magaalada Muqdisho ayaa la sheegayaa in mustaqbalka laga guuri doono, maadaama magaalada gudaheeda uu ku yaallo, garoonkana uu isku bedelay meelo deegaan u ah Safaarado iyo Hey’addo shisheeye, sidaas darteed mustaqbalka la rajeynayo in garoon weyn oo caalami ah laga dhisi doono duleedka Muqdisho.
Dowladda Sacuudi Carabiya ayaa horay u balan-qaaday mashaariic ku baxaya ballaayiin doolar inay ka hirgelin doonto Soomaaliya, kaasoo uu ku jiro garoon diyaaradeed.
