Wararka aan ka heleyno deegaan ku yaalla duleedka Magaalada Garoowe ee Xarunta Gobolka Nugaal ayaa sheegaya in halkaas Maanta laga helay Meydka Canug yar oo muddo todobaad la raadinayay.
Meydka Canuga yar ayaa waxaa laga helay deegaanka Jilab ee duleedka Magaalada Garoowe, waxaana Canuga da’diisa lagu qiyaasay laba sano jir, kaasi oo waalidkii dhalay ay raadinayeen muddo shan maalmood ah.
Taliyaha qeybta Booliska Gobolka Nugaal Korneyl Muumin Cabdi Shire ayaa sheegay in Ciidanka Booliska Meydka Canuga yar ay ka dhex heleen goob Qashinka lagu shubo oo ku taalla deegaanka Jilab, isla markaana uu ku dhex jiray Jawaan.
Sidoo kale Taliye Muumin ayaa waxaa uu tilmaamay in Ciidanka Booliska Puntland ay wadaan baaritaano kala duwan oo ku aadan cidii ka dambeysay dhacdadaan foosha xun.
Si kastaba dadka deegaanka Jilab ee duleedka Magaalada Garoowe ayaa si weyn Maanta u hadal haaya dhacdadaan, waxaana dadka deegaanka ay sheegeen in arrintaan ay ku Cusub tahay, isla markaana aan weli deegaanka horey looga arkin.
