Guddoomiyaha Xisbiga Midowga Nabadda iyo Horumarka (UPD) ahna Madaxweynihii hore ee Soomaaliya Xasan Sheekh Maxamuud ayaa waxaa uu ka hadlay hal ka soo yeeray Taliyihii hore ee hay’adda Nabadsugida iyo Sirdoonka Qaranka Soomaaliyeed ee NISA Cabdullaahi Maxamed Cali Sanbaloolshe.
Hadalka ka soo yeeray Cabdullaahi Sanbaloolshe oo ka tirsan Xisbiga UPD,kaasi oo dhaliyay Muran ayaa waxaa uu uga hadlay siyaasadda qabaliga ah ee ku dhisan tahay dowladda Federaalka Soomaaliya.
War qoraal ah oo bartiisa Facebook uu kusoo qoray Xasan Sheekh ayuu ku sheegay in aragtida uu qabo Cabdullaahi Sanbaloolshe ay tahay mid isaga u gaar ah,isla markaana aan ka turjumeyn mabaa’diida Xisbiga Midowga Nabadda iyo Horumarka oo uu isaga ka tirsan yahay.
Warka Xasan Sheekh Maxamuud ayaa waxaa uu u qornaa sidan:-
“Siyaasadda Soomaaliya ee xilliyadaan dambe waxay ahayd mid gabi dhacleyneyso oo aan jihaysneyn, sidaas daraadeed ayaa mararka qaar lala kulmaa aragtiyo kala duwan ama ka durugsan mabadi’dii siyaasadeed ee asaasiga inoo ahayd, taas oo ku qeexan dastuurka Kmg ah, oo siinaya muwaadiniinta Soomaaliyeed xuquuq siyaasadeed oo siman.
Baryahaan waxaa baraha bulshada yiillay ra’yi uu ka hadlay mudane Cabdullaahi Maxamad Cali (Sanbaloolshe).
Mudane Sanbaloolshe waa mas’uul ka tirsan Xisbiga Midowga Nabadda iyo Horumarka (UPD), hase yeeshe arrinka uu ka hadlay ee la xiriira siyaasadda qabaliga ah, ka mid ma aha mabaadi’da Xisbiga UPD ee ku cad xeerka iyo barnaamijka Xisbiga ee waa ra’yiga gaarka ah ee mudanaha Ummadda Soomaaliyeedna sidaas ha ula socoto arrinkaas”ayuu yiri Xasan Sheekh Maxamuud.
