Madaxweynaha dowlad Goboleedka Jubbaland Axmed Maxamed Islaam Axmed Madoobe ah oo ah Musharax u taagan qabashada xilka Madaxtinimada Jubbaland ayaa  Maanta Xildhibaanada Baarlamaanka maamulkaas ka hor jeediyay Khudbadiisa Musharaxtinimo.
Musharax Axmed Madoobe ayaa waxaa uu ka hadlay arrimo kala duwan oo u badan waxyaabihii u qabsoomay inta uu xilka haayay iyo kuwa uu doonayo hadii markale xilka loo doorto inuu qabto.
Sidoo kale Axmed Madoobe ayaa waxaa uu sheegay in Arrimaha siyaasadda ay doonayan inay Dowladda Federaalka Soomaaliya kala shaqeeyaan, talaabo walba oo dhanka hormarka loo qaadayo yaraynta baahida iyo daruufaha dadkeenna.
Musharrax Axmed Maxamed Islaam “Arrimaha siyaasadda waxaan doneynaa inaan DFS kala shaqeyno talaabo walba oo dhanka hormarka loo qaadayo yaraynta baahida iyo daruufaha dadkeenna, ka shaqeynta hormarinta bulshada ayaan ka wada shaqaynaynaa iyo dhammaan maamul wanaaga”.ayuu yiri Axmed Madoobe.
Isaga oo sii hadlaayay ayuu tilmaamay in Jubbaland ay ka faa’iiday Arrimaha dib u dejinta dadka Qaxootiga ka soo laabtay,kuwaasi oo uu sheegay in  shaqo wanaagsan ka hayaan hay’adaha dowladda.
“Arrimaha dib u dejinta dadka Qaxootiga ka soo laabtay waxaan hubaa inaan ka faa’idnay dadka dalka dib ugu soo laabtay oo ay shaqo wanaagsan ka hayaan hay’adaha dowladda waxaan ka sii shaqeyn donaana arrimaha dib u soo celinta Qaxootiga Soomaaliyeed”.ayuu sii raaciyay.
Magaalada Kismaayo ayaa Maanta waxaa ka socota hadal-jeedinta Musharaxiinta u taagan qabashada xilka Madaxweynaha dowlad Goboleedka Jubbaland.