War Goordhow soo gaaray Radio Dalsan ayaa waxaa uu sheegayaa in gudaha Degmada dharkeenley ee Gobolka Banaadir lagu dilay laba ruux oo la sheegay in ay ahaayeen Ganacsato.
Dilkan ayaa waxaa uu ka dhacay agagaarka Daarta Xaaji Gaabow ee Degmada dharkeenley,isla markaana waxaa geystay Kooxo ku hubeysnaa Bastoolado,iyadoo laba ruux halkaasi ay ku sugnaayen xiliga uu falka dhacayay.
Kooxihii ka dambeeyay dilkaas ayaa goobta uga baxsaday gaari nooca raaxada ah oo ay wateen sida dad goobjoogaal ah Dalsan ay u sheegeen.
Ciidamo ka tirsan kuwa Booliska Soomaaliya ayaa tegay halkaas,isla markaana waxaa ay goobta ka qaadeen Meydka labada marxuum ee la dilay.
Sidoo kale waxaa lagu soo waramayaa in baaritaano kala duwan Caawa Ciidamada dowladda ay ka wadaan gudaha Degmada dharkeenley ee Gobolka Banaadir.
Magaalada Muqdisho ayaa tan iyo markii ay bilaabatay Bisha Barakeysan ee Ramadaan waxaa ka dhacyay dilal qorsheysan oo ay geysanayeen kooxo ku hubeysan Bastoolado,xili amniga Caasimadda aad loo adkeeyay.