Afhayeenka Taliska Dhexe ee Milliteriga Maraykanka, Bill Urban ayaa sheegay in Isbahaysiga Milliteriga Maraykanka heegan sare la geliyey, iyadoo laga cabsi qabo in la weeraro Ciiddankooda.
Hadal-qoraal oo uu soo saraay ayuu Afhayeenka ku sheegay inay heleen digniin ku aadan Khatartaasi, wuxuuna xusay inay si dhow u ilaalayn doonaan xaalladda.
Mar sii horreysay, Ku-xigeenka Ciiddanka Isbahaysiga Maraykanka hoggaamiyo, Jeneral Kiristofar Gika oo u dhashay Britain ayaa sheegay in heerka cabsida ee Kooxaha ay Iiraan taageerto ee ka dhanka ah Ciiddanka Isbahaysiga ee ku sugan gudaha dalalka Iraq iyo Syria aysan sare u kicin.
Waaxda Gaashaandhigga Maraykanka ee The Pentagon waxay kordhiyeen Ciiddankooda ka jooga Gobalka Bariga Dhexe , iyagoo Markab Diyaaradaha xambaarta u direen Gacanka Beershiya.
Milliteriga dalalka Iiraan iyo Maraykanka ayaa qarka u saaran inuu dhex maro Dagaal lagu hoobto, inkastoo uu Xoghayaha Arrimaha Dibedda Maraykanka, Mayk Bombeeyo shalay sheegay inaysan doonaynin inay dagaal la galaan Iiraan.
