Madaxweynaha dowlad Goboleedka Puntland Saciid Cabdullaahi Deni ayaa xalay waxa uu Shir wadatashi ah isugu yeeray Madaxda maamul Goboleedyada dalka ka jira iyo Madaxda sare ee dowladda Federaalka Soomaaliya.
Madaxweyne Deni oo Shir Jaraa’id uu uga hadlayay Safarkiisii uu ku tegey dalka Isutagga Imaaraadka ku qabtay Garoowe ayaa waxaa sheegay in Shirkan la qaban doono 2-da bisha May,isla markaana uu ka furmi doono Magaalada Garoowe ee Caasimadda maamulka Puntland.
Shirkan ayaa waxaa ka qeyb geli doona oo lagu Casuumaday Madaxweynaha Soomaaliya Maxamed Cabdullaahi Farmaajo,Ra’iisul Wasaare Xasan Cali Kheyre,Madaxda maamulada dalka sida,Jubbaland,Koonfur Galbeed,Hirshabeelle iyo Galmudug.
Sidoo kale waxaa la filayaa in looga hadli doono Shirkan qodobo ay kamid ah sidii ay wadashaqeyn u yeelan lahaayeen Madaxda maamul Goboleedyada dalka ka jira iyo dowladda Federaalka iyo arrimo kale oo ku aadan xaaladda dalka.
Ugu dambeeyntii Madaxweynaha dowlad Goboleedka Puntland Saciid Cabdullaahi Deni ayaa tilmaamay in magaca shirkan uusan qaadan doonin magaca Golaha Amniga Qaranka oo kale,isagoo rajo wanaagsan ka muujiyay qodobada ka soo bixi doona Shirkaas.
Hoos ka Dhageyso Codka Madaxweynaha Puntland.
