Faah faahin dheeraad ah ayaa ka soo baxaya qarax Maanta ka dhacay qeybo kamid ah Wadada Maka Al-mukarama ee Magaalada Muqdisho.
Qaraxa oo ahaa mid lagu soo dhajiyay Gaari nooca Soomaalida u taqaano SRUF ayaa ku qarxay meel ku dhow Isgoyska Shaqaalaha ee Muqdisho,iyadoo wadada xiligaas ay aheyd mid Mashquul ah.
Dad goobjoogayaal ah oo la hadlay Dalsan ayaa u sheegay in qaraxa uu ahaa mid xoogan,isla markaana jugtiisa laga maqlay Xaafado ka tirsan Gobolka Banaadir,iyadoona uusan geysan wax Khasaaro ah.
Wararka ayaa intaasi waxa ay ku darayaan in Gaariga qarxay uu lahaa Sarkaal ka tirsan Ciidanka Booliska dowladda,isagoona ka badbaaday,waxaana xiliga uu qarxayay Gaariga uu ku yaalla wadada dhinaceeda.
Sida caadada aheyd goobta uu qaraxa ka dhacay ayaa waxaa gaaray Ciidamo ka tirsan kuwa Booliska,kuwaasi oo xiray Wadada,isla markaana waxaa intaas hakad ku jiray isku socodka gaadiidka dadweynaha iyo ganacsigii ku yaallay halkaas,hayeeshee markii dambe dib ayay u fureen Ciidamada.
Magaalada Muqdisho ayaa waxaa ka socda howlgalo amniga lagu xaqiijiyo sida ay horey u sheegeen laamaha amniga dowladda Soomaaliya,waxaana weli xiran qaar kamid ah Wadooyinka Magaalada.
