Maamulka Degmada Kaaraan ee Gobolka Banaadir ayaa faah faahin ka bixiyay weerar isugu jiray dil iyo dhaawac oo Caawa kooxo hubeysan ay ka geyteen gudaha degmadaas.
Guddoomiye kuxigeenka Amniga iyo Siyaasada Degmada Kaaraan Deeq Xasan Sheekh oo la hadlay Idaacada Dalsan ee Magaalada Muqdisho ayaa marka hore sheegay in weerarkan uu ka dhacay inta dhexeeysa Xarunta Degmada iyo Saldhiga gaar ahaan Shaleemo Liibaan,isla marlaana lagu qaaday Salkaan ka tirsanaa Ciidanka dowladda iyo qof shacab ah oo la socday.
Waxa uu sheegay in Weerarka uu dhaawac ka soo gaaray Sarkaalka ka tirsan Ciidanka dowladda oo lagu magacaabo Cadaan Cali Maxamed ,iyadoona uu ku dhintay qof shacab ahaa oo la socday Sarkaalka.
Sidoo kale waxaa uu tilmaamay Guddoomiye kuxigeenka Amniga iyo Siyaasada Degmada Kaaraan Deeq Xasan Sheekh Kaaraan in kooxihii weerarkaas fuliyay ay wateen gaari nooca raaxada ah,isla markaana haatan ay wadaan baaritaano kala duwan oo lagu baadi goobayo kooxihii ka dambeeyay falkaas.
Ugu dambeyntii Deeq Xasan Sheekh waxa uu xusay in dhowr qof ay usoo qabteen falkii Caawa ka dhacay degmada Kaaraan ee Gobolka Banaadir.
Magaalada Muqdisho ayaa waxaa mararka qaarkood ka dhaca dilal qorsheyan oo loo geysto Askar ka tirsan Ciidanka dowladda iyo dadka shacab ah,waxaana Mas’uuliyadooda sheegta Al-shabaab.
Hoos ka Dhageyso Codka Guddoomiye kuxigeenka Amniga iyo Siyaasada.