Wararka aan ka heleyno Degmada Balcad ee Gobolka Shabeellaha Dhexe ayaa waxa ay sheegayaan in xaalada degmadaas saakay tahay mid degan,kadib markii xalay Al-shabaab ay la wareegeen qeybo kamid ah,iyagoona dib uga baxay.
Waxaa la sheegay in Al-shabaab weerar xoogan ay ku soo qaadeen Balcad,waxaana weerarka kadib xigay dagaal dhexmaray iyaga iyo Ciidamada dowladda Soomaaliya,kaasi oo geystay khasaaro isugu jira dhimasho iyo dhaawac oo labada dhinac soo kala gaaray.
Dadka deegaanka oo la hadlay Dalsan ayaa waxa ay u sheegen in Al-shabaab saacado kooban ay ku sugnaayeen gudaha degmada,isla markaana ay la wareegeen Saldhiga iyo Xarunta maamulka,iyagoona halkaas kasii daayay Maxaabiis ku xirneyd.
Ciidamada AMISOM ee Saldhiga ku leh Warshadda Dharka Balcad ayaa hoobiyeyaal ku gaaray inta shabaab ay ku sugnaayeen gudaha degmada,kuwasi oo aan la shaacin khasaaraha ay geysteen.
Ciidamada dowladda Soomaaliya ayaa dhowr Saacadood kadib dib ula wareegay gacanta ku heynta degmada Balcad ee Gobolka Shabeellaha Dhexe,waxaana xaalada guud ee halkaasi saakay ay tahay mid degan.
Ilaa iyo hadda lama oga Khasaaraha rasmiga ee ka dhashay dagaalkii ka dhacay degmada Balcad ee Gobolka Shabeellaha Dhexe,waxaana Magaalada Muqdisho ay u jitaa 30-KM.
