Somalia waxay si rasmi ahaan ula wareegtay xilliga meertada ee Guddoominta Shirarka Dowladaha Carabta, iyadoo uu Wasiirka Arrimaha Dibedda ee Somalia, Axmed Ciise Cawad maanta guddoominayey Shirka 151-aad ee Wasiiradda Arrimaha Dibedda ee dowladaha xubnaha ka ah Ururka Jaamacadda Carabta.
Wasiiradda waxay kulankooda ku lafa-guri doonaan Ajendayaal muhiim ah iyo sidii loogu diyaar garoobi lahaa Kulanka soo socda ee Ururka Jamaacadda Carabta oo dalka Tunisia lagu qaban doono dabayaaqada bishan Maarso.
Wasiiradda Arrimaha Dibedda Carabta waxay kaloo yeesheen Kulamo Wada-tashi ah oo ay ku eegeen Hawlaha siyaasadda Carbeed, Dhaqaalaha, Dhaqanka, Bulshadda iyo Nabadda ee dalalka Carbeed.
Sidoo kale, Ajendayaasha ay Wasiiradda ku gorfeyn doonaan Shirkooda waxaa ka mid ah sidii taageero loo siin lahaa Somalia iyo Jesiiradda Komoros, Dagaalladda ka socda dalalka Syria, Libya iyo Yemen, Khilaafka Falastiin iyo Israel, Muranka Xuduudka ee dalalka Jabuuti iyo Eritrea iyo 3 Jesiiradood ee Imaaraadka oo  ay Iiraan xoogga ku haysato , Arrimaha Xuquuqda Aadana, Ka-hortaga Hubka iyo Kooxaha Xag-jirka.
Warbaahinta dalka Masar waxay sheegeen inay Somalia la wareegtay Meertadda Guddoominta Shirarka Carbeed ee lixda bilood ee soo socota, waxaana Kulankii maanta goobjoog ka ahaa Xoghayaha Guud ee Ururka Jaamacadda Carabta, Axmed Abu Alkheyd.
