Madaxweynayaasha dalalka Somalia iyo Kenya waxay maanta Kulankoodii ugu horreeyey ka yeesheen muranka Xuduud-baddeedka oo ay labada Dowladood ku kala irdhoobeen.
Kulankaasi oo ka dhacay Nairobi waxaa Shir-guddoominayey Ra’iisul-wasaaraha Ethiopia, ahna Madaxa Urur-gobaleedka IGAD ee sannadkan.
Qoraal uu Abiy Axmed soo dhigay bartiisa Twitter-ka waxa uu ku sheegay inay Labada Madaxweyne ku heshiiyeen inay ka wada shaqeeyaan Nabadda iyo inay qaadaan tallaabooyinka looga hortagayo Xiisadda ka dhex aloosan.
Ra’isul-wasaaraha Ethiopia waxa uu bishan March 1-dii iyo 5-dii Kulamo Diplomaasiyadeed la kala yeeshay Labada Madaxweyne ee Somalia iyo Ethiopia.
Xiisadda muranka xuduudka badda ee labada Waddan ayaa noqotay udub-dhexaadka Khilaafka Diplomaasiyadeed ee labada Waddan.
Bishii la soo dhaafay ee Feberaayo 16-dii, Xoghayaha Joogtadda ee Wasaaradda Arrimaha Dibedda ee dalka Kenya, Majariya Kamau waxa uu soo saaray qoraal uu ugu yeeray Danjiraha Kenya ka jooga Somalia, Jeneral Luka Tumbo, iyo Danjirihii Somalia u joogay Kenya, Ambassador Maxamuud Axmed Nuur “Tarzan†laga soo cayriyey Nairobi.
Dowladda Kenya waxay cayrintaasi ku micneeyeen mid ay kaga soo horjeedaan Tallaabadda ay Somalia ku xaraashayso Xirmooyinka Shidaalka iyo Gaaska Dabiiciga ee ku jira xuduud-baddeedka Kenya.
Golaha Wasiiradda Kenya waxay kaloo ku hanjabeen inay Somalia ku soo rogi doonaan Cunaqabatayn iyo inay u aqoonsadaan Somalia dal cadow ku ah Kenya.
Kulanka labada Madaxweyne ay uga wada hadleen Muranka xuduud-badeedka ayaa waxa uu ku soo beegmayaa,iyadoo Maanta Villa Soomaaliya sheegtay in aysan marnaba ka tanaasuli doonin taako kamid ah dalka,isla markaana kiiska badda lagu muransan yahay ee yaalla Maxkamadda Caddaaladda Adduunka aan wax gorgortan ah laga geli doonin.
Si kastaba ha ahaatee, Dowladda Somalia waxay ku adkeysatay in lagu kala baxo Maxkamadda Calaamiga ee ICJ, balse, Dowladda Kenya waxay doonaysaa in Muranka xuduud-baddeedka lagu dhameeyo Wada-xaajood iyo Heshiis xaal-mastuur ah.