Ciidanka Nabadsugidda maamulka Galmudug ee NISA ayaa Cawaa la wareegay gacan ku heynta Xarunta Madaxtooyadda maamulkaasi ee ku taalla Magaalada Cadaado ee Gobolka Galgaduud.
Howlgalka lagula wareegay Madaxtooyadda Cadaado ayaa waxaa hogaaminaayay Taliyaha NISA qeybta Galmudug Cabdi Dheere ,iyadoona ay ka qeyb qaateen,Ciidanka Kumaandooska Danab ee 21-aad.
Sidoo kale Wariyaha Warbaahinta Dalsan ee ku sugan Magaalada Cadaado ayaa soo sheegaya in Xaruntaasi ay muddooyinkii dambe ay gacanta ku hayeen Maleeshiyaad hubeysan oo la wareegay tan iyo markii uu khilaaf soo kala dhexgalay Madaxda maamulka Galmudug,hayeeshee Caawa laga saaray halkaasi.
Warar hoose oo aan heleyno ayaa sheegaya in amarka Maleeshiyaadka hubeysan looga saaray Madaxtooyadda Galmudug ee Cadaado bixisay dowlada Soomaaliya,iyadoo halkaasi la filaayo inay gaaraan maalmaha soo socda Madax ka tirsan dowlada Soomaaliya.
Xaaladda Magaalada Cadaado ayaa haatan ku soo laabtay si caadi ah,kadib markii fiidkii hore ee Caawa halkaasi mararka qaar laga maqlayay rasaas ka dhaceysa.