Saraakiil ka socotay Dowladda Mareykanka iyo Madaxda ugu sareysa Maamulka Galmudug oo kulan yeeshay ayaa isla gartay in Saldhig Weyn Ciidamada DANAB oo ay tababarto dowladda Mareykanka loogu furo deegaanada Maamulka Galmudug.
Saraakiisha ayaa ka hor kulanka waxaa la geeyey Goob loogu talo galay in Saldhigaas laga dhiso oo ku taalla duleedka degmada Dhuusamareeb ee Xarunta Gobolka Galgaduud,iyada oo Saraakiisha howlgalka Mareykanka ee Soomaaliya(Africom) ka socotay ay sheegeen in la dhisi doono si deg deg ah.
Agaasimaha Madaxtooyada Dowlad goboleedka Galmudug Maxamed Cabdi Gaboobe ayaa sheegay in Saraakiisha ciidamada Mareykanka iyo kuwa Danab iyo Madaxda Galmudug uu hoggaaminayey Madaxa Xukuumadda Galmudug Maxamed Shaakir ay siwadajir ah u sheegeen in saldhigaas la dhiso.
Waxa uu sheegay  in Saldhigaas lagu tababari doono Ciidamo ka tirsan kuwa DANAB qeybtooda Maamulka Galmudug,sidoo kalena halkaas loosoo wareejin doono ciidamada iyo Saraakiisha DANAB ee ku sugan Saldhigga Magalada Gaalkacyo ee Xarunta Gobolka Mudug.
Ciidamada DANAB ee xoogga dalka Soomaaliya ayaa waxaa tababaro iyo dhaqaalaba siiya Mareykanka,iyaga oo Saldhig Weyn ku leh Garoonka Balli-doogle ee Gobolka Shabeellaha Hoose,waxana mararka qaar ay fuliyaan weeraro cir iyo dhul ah oo lagu qaado saldhigyo ay leeyihiin Al-Shabaab.