Wararka ka imaanaya gobolka Gedo ayaa waxa ay sheegayaan in ciidamada Kenya kolonyo ay wateen qaraxyo lagula eegtay meel u dhow qeybo kamid ah gobolka Gedo.
Ilaa laba qarax oo miinada dhulka lagu aaso ah ayaa lagu soo warramayaa in ciidamada Kenya lagula eegtay halkaas isla markaana qaraxyada ay haleeleen gaadiidka ay wateen ciidamada Kenya.
Goobjoogayaal ayaa waxa ay Dalsan u sheegeen qaar ka mid ah Ciidamada Kenya  in ay dhimasho iyo dhaawac ku noqdeen qaraxyada inkastoo aanan la heyn tirada saxda ah ee qaraxa ku waxyeeloowday.
Kolonyada ciidamada ee qaraxa lala eegtay ayaa waxaa la sheegay inay sahay raashin ah u wadeen ciidamada kale oo Kenyan ah oo saldhig milatari kuleh deegaanka Taabta.
Ciidamada Kenyaa inta badan qaraxyo lagula eegtaa qeybo kamid ah gobolka Gedo iyo deegaanada kale ay kaga suganyihiin Somalia waxana qaraxyadaas intooda badan mas’uuliyaddooda sheegta Al-Shabaab oo sidoo kale weeraro culus ku qaada saldhigyada ciidamada Kenya.