Dowladda Turkiga ayaa Xabsi ku yaalla Istambuul dhigtay 14 Qof oo looga shakisan yahay inay xiriir dhow la leeyihiin Ururka Daacish, sida ay laamaha ammaanka sheegeen Jimcaha Maanta ah.
Booliska ka hor taga argagixisada ayaa si isku mid ah ugu howl-galay Sagaal Degmo oo ay Dadka ku badan yihiin, lamana caddeyn xubnahan lasoo qabtay magacyadoodsa sababo jira awgood.
Laamaha ammaanka Dalka Turkiga ayaa sheegay inay Degmooyinka qaar kasii socon doonaan howl-gallada lagu baadi goobayo tuhmanayaasha lala xiriirinayo inay Gacan saar la leeyihiin Daacish.
Tuhmanayaashan ayaa markii lasoo qabanayay isu diyaarinayay weerar, markii laga helay macluumaadyo ay ka mid yihiin Dukumiintiyo iyo qalabka Ellegtarigga ee ay adeegsadaan Daacish,sida laga soo xigtay ilo ku dhow howl-galka.
Ciidanka ammaanka ee Turkiga ayaa la sheegayaa inay muddo badan la socdeen dhaq-dhaqaaqyada kooxdan la qabtay, kuwaasoo qorsheynayay inay weerar ka geystaan gudaha Turkiga.
In ka badan 300 oo Shacab ah ayaa ku naf weyday weerarro ay masuuliyaddiisu sheegatay Daacish oo ka dhacay gudaha Dalka Turkiga, kuwaasoo loo adeegsaday ismiidaamin, Hoobiyeyaal iyo weerarro bareer ah.
