Ciiddanka Ammaanka ee dalkaasi ayaa shalay qaaday Hawlgal ay ku baarayeen Dhismo ay deganaayeen Dhallinyaro u kala dhalatay Somalia, Masar iyo Syria, wax yar kadib, markii bam yar uu ku qarxay Koonfurta Caasimadda dalkaasi ee Khartoum.
Hadal ka soo baxay Wasaaradda Arrimaha Gudaha ee dalkaasi ayaa lagu sheegay inuu Qaraxaasi ku dhaawacmay ninkii rakibayey bamkaasi, kaasi oo ay Ciiddanka ku raad-joogaan.
Ninka dhaawaca ayaa la sheegay inuu tegay Isbitaal u dhow halka uu qaraxu ka dhacay, balse ay Dhakhaatiirta diideen inay daaweeyaan, isagoo aan Boliska ka haysanin Qoraal lagu daaweyn karo.
Afhayeenka Boliska Sudan, Jeneral Cumar Al-mukhtaar ayaa sheegay inay socdaan Baaritaanka Boliska ee ku aadan faahfaahinta waxa sababay qaraxaasi.
Boliska Sudan waxay kaloo xaqiijiyeen qaraxaasi, sida laga soo xigtay Sarkaal Bolis oo ku sugnaa Xaafadda u uqaraxu ka dhacay oo lagu magacaabo Arkawit ee Koonfurta Khartoum.
Ciiddan badan ayaa isku gedaamay Dhismaha uu qaraxu ka dhacay, kaasi oo ay Dhallinyaro ka soo jeeda Dalalka Carabta deggan yihiin.
Dhinaca kale, Wasaaradda Arrimaha Gudaha ee dalkaasi waxay sheegtay inay Hawlgalkii ay Ciiddanka ka fuliyeen Dhismaha ay Dadka shisheeyaha degganaayeen ka heleen waxyaabaha qarxa iyo Baasabooro Ajnabi.
Ciiddanka ayaa sheegay inaysan cidna ku soo xirin Hawlgalkaasi, waxaana socda Baaritaano dheeraad ah.
Xigasho: REUTERS & SUDAN TRIBUNE
©Radio Dalsan