Madaxweynaha Uganda, Yoweeri Museveni oo dhawaan ka qeyb galay Sannad-guuradii 66-aad ee Aasaaska Ururka Midowga Europe ayaa mar kale ka shanqariyey inay EU-da dib u eegaan go’aanka ay ku dhimeen Kharajka la siiyo Hawlgalka AMISOM.
Madaxweyne Museveni oo Kulan Khaas ah la yeeshay Wakiilka EU-da u jooga Uganda, Kristian Schmidt waxay si gaar ah uga hadleen Doorashaddii Uganda ee uu ku guuleystay Museveni iyo Hawlaha Horumarinta ee ay EU-da ka horgeliyaan dalkaasi.
Wakiilka EU-da u jooga Uganda, Kristian Schmidt waxa uu ugu baaqay Hoggaamiyayaasha Uganda, Xisbiyadda Siyaasadda iyo Bulshadad Rayidka inay si wadajir isugu yimaadaan, kuna heshiiyaan marka ugu horreyso Danaha Qaranka Uganda.
Dhinaca kale, Wasiirka Arrimaha Dibedda ee Uganda, Sam Kutesa oo ka hadlay Munaasabadaasi ayaa kor u qaaday Calan Casaan ah, oo uu ku muujiyey sida ay uga soo horjeedaan qorshihii EU-da ku dhimeen Taageeradda Dhaqaalaha ee ay siiyaan Hawlgalka AMISOM.
Waxa uu intaasi ku daray in Dhaqaale-dhimista lagu soo beegay xilligan oo ay si xawli ah ku xocdaan Dadaalka Nabadda ee Somalia, isla markaana ay Dadka Soomaalida u diyaar garoobayaan sidii ay u yeelan lahaayeen Dowlad cusub.
Dowladda Uganda waxaa walaac xooggan ku haya Qiimo-dhimista EU-da ee Hawlgalka AMISOM, iyadoo ay in ka badan 6,000 oo Askar u dhalatay dalka Uganda qeyb ka yihiin Hawlgalka AMISOM.
Hawlgalka Nabadda ee Somalia waxaa taageera Midowga Europe, Maraykanka iyo QM, iyadoo ay Hawlgalka AMISOM qeyb ka yihiin Ciiddamo ka kala socda dalalka Uganda, Jabuti, Kenya, Ethiopia iyo Burundi.
©Radio Dalsan
