War-saxaafadeed ka soo baxay Wasaaradda Arrimaha Dibadda Soomaaliya kuna qornaa afka Carabiga ayaa lagu sheegay in weerarka lagu qaaday safaaradda Sacuudiga ee Tehran uu jabinayo heshiisyadii caalamiga ahaa ee dhinaca diblomaasiyadda ee sanadki 1961-dii  lagu gaaray magaalada Vienna.
Wasaaradda Arrimaha Dibadda Soomaaliya ayaa sheegtay in heshiiskaas uu farayo ilaalada xarumaha Safaaradaha ku yaalla aduunka iyo shaqaalaha Diblomaasiyadeed.
War-saxaafadeedka ayaa lagu xusay in Soomaaliya ay ku garab taagan tahay dowladda Sacuudiga howl gallada ka dhanka ah argagixisada, isla markaana ay ku taageereyso adkeynta amniga iyo xasiloonida Boqortooyada ka waddo dalkeeda iyo gobolkaba.
Dowladda Sacuudiga ayaa xiriirka u jartay dowladda Iran, kaddib markii dibad baxayaal careysan ay weerareen Safaaradda Sacuudiga ee Tehran.
Dhinaca kale, Dowladaha Baxrayn iyo Sudan waxay xiriirka u jareen Iiraan, halka ay Dowladda Imaaraadka yareysay Heerka Xiriirka Diplomaasiyadda Iiraan.
