Afhayeenka Safaaradda Maraykanka ku leeyihiin dalka Ethiopia, David Kennedy ayaa shaaciyey inay joojiyeen Hawlgalladdii Diyaaradaha Droneska ee adeegsan jirey  Saldhig ku yaalla Degmadda Arba Minch ee Koonfurta dalka Ethiopia.
Afhayeenka oo E-mailo u diray Wakaalladaha Wararka Caalamiga ayaa ku sheegay inay Labada Dowladood isku raaceen inaan xilligan loo baahnayn Joogitaanka Maraykanka ee Saldhigga Diyaaradaha ee Degmadda Arba Minch oo ay isticmaali jireen tan iyo sannadkii 2011-kii.
Saldhigaasi waxaa loo adeegsan jirey Diyaaradaha Droneska ee dhinacyadda Sirdoonka iyo Duqeymaha ee lala  beegsan jirey Alshabaabka Somalia iyo Kooxaha taabacsan Alqaacida ee ka hawlgala gudaha dalka Yemen.
Dowladda Maraykanka waxay adeegsiga Garoonkaasi bilaabeen bishii October 30-dii ee sannadkii 2011-kii, kadib, markii ay Dowladaha Maraykanka iyo Ethiopia isla garteen inay Droneska Maraykanka isticmaalaan Saldhigga Diyaaradaha ee Degmadda Arba Minch si ay uga weeraraan Alshabaabka ku sugnaa Koonfurta Somalia.
Dhinaca kale, Ka-bixitaanka Milliteriga Maraykanka ee Koonfurta Ethiopia ayaa ku soo beegantay iyadoo ay Qowmiyadda Oromiya bilaabeen Kacdoon ay kaga soo horjeedaan qorshe ay Dowladda Federalka Ethiopia kula wareegayaan dhul ay Oramadda ku leeyihiin duleedka caasimadda dalkaasi ee Addis Abeba.
©Radio Dalsan   Â
