Madaxweyne Xasan Sheekh Maxamuud ayaa booqasho hawleed ku jooga caasimadda dalka Uganda ee Kampala, si uu kulan la leh dhigiisa dalkaasi, Yoweeri Museveni.
Labada Madaxweyne ayaa lagu wadaa inay kulan ka yeeshaan Dardar-gelinta Hawlgalka AMISOM ee La-dagaalanka Xarakadda Alshabaab.
Madaxweyne Xasan Sheekh marka uu dhamaysto booqashadda Uganda, waxa uu sii mari doonaa dalka Djibout, si uu ula kulmo Madaxweyne Ismaaciil Cumar Geelle.
Labada Madaxweyne waxa u qorsheysan inay u baqoolaan dalka Sacuudiga, si ay uga qeyb galaan Shirweynaha Afaraad ee Hoggaamiyayaasha 22-ka waddan ee xubnaha ka ah Ururka Jaamacadda Carabta iyo 12-ka Waddan ee ku yaalla Koonfurta Qaaradda Amerika oobishan November 11-da ka furmi doona caasimadda dalka Sacuudiga ee Riyadh.
Shirweynahaasi oo socon doona muddo 2 cisho ayaa waxaa looga hadli doonaa Qaddiyadaha Calaamka, Dalxiiska, Tacliinta, Ammaanka, Teknoolajiyadda, La-dagaalanka Argagixisadda, Xiriirka labada dhinac, Arrimaha Somalia, Yemen, Libya iyo Xiisadda Dowladaha Arjentina iyo Britain ee Jesiiradda Falkland Island.
Dhinaca kale, Shirka Hordhaca ee Madaxda dalalka Carabta iyo kuwa Latin America ayaa waxa uu shalay ka furmay caasimadda dalka Sacuudiga ee Riyadh, iyadoo uu shir-guddoominayey Madaxa Wasaaradda Arrimaha Dibedda Sacuudiga ee ugu qaabilsan Xiriirka Caalamiga, Amiir Turki Bin Maxamed Bin Saciid.
Madaxa Ergadda dalka Brazil, Maria Dola Rice ayaa sheegtay in guul laga gaaray Iskaashiga dalalka Carabta iyo kuwa Latin America, iyadoo uu Xiriirkaasi haatan 10-sanno jirsaday.
Shirweynaha Madaxda dalalkaasi oo afartii sannaba mar la qabto ayaa waxaa Kulankoodii koowaad uu ka dhacay dalka Brazil, iyadoo Shirkoodii Labaadna uu ka dhacay dalka Qatar, Kii saddexaadna dalka Peru, iyadoo Shira Afaraadna uu bishan 10-da ka furmayo caasimadda dalka Sacuudiga ee Riyadh.
© Radio Dalsan
Â
