Ergayga Gaarka ee Ururka Midowga Afrika ee Arrimaha Somalia, ahna Madaxa Hawlgalka AMISOM, Ambassador Maman Sidikou ayaa xaqiijiyey inaysan weli soo gaarin 12-Diyaaradaha Helikopterradda oo loo deeqay Hawlgalka AMISOM sannadkii 2013-kii.
Waxa uu tilmaamay inay u baahan yihiin Taageero iyo in loo maalgeliyo sid ay Diyaaradaasi u noqdaan kuwo xaallad wanaagsan leh.
Ambassador Maman Sidikou waxa uu tilmaamay inay Ciiddanka AMISOM dhibaato ku qabaan xaalladda xun ee Waddooyinka Somalia isla markaana ay u baahan yihiin qalabka looga hortago Miinooyinka ee IEDs.
Dhinaca kale, Ergayga Gaarka ee Ururka Midowga Afrika ee Arrimaha Somalia, ahna Madaxa Hawlgalka AMISOM, Ambassador Maman Sidikou waxa kaloo uu sheegay inay Ururka Midowga Europe qorsheynayaan inay sannadka soo socda dhimmi doonaan 20% dhaqaalihii ay siin jireen Hawlgalka AMISOM.
Waxa kaloo uu sheegay inaan la dhimi Karin tirada guud ee ciiddanka AMISOM oo haatan gaarayo 22,000 oo Askari.
Ergayga Gaarka ee Ururka Midowga Afrika ee Arrimaha Somalia, ahna Madaxa Hawlgalka AMISOM, Ambassador Maman Sidikou oo Wareysi siiyey Wargeyska The East African ayaa ka soo horjeestay Baaqa Siyaasiyiinta Kenya ee ku aadan in Ciiddanka Kenya laga soo saaro Somalia, wuxuuna tilmaamay inay Ciiddankaasi qabtaan waxa uu ugu yeeray Shaqo Lala yaabay, isla markaana aan loo baahnayn in la niyad-jebiyo.