Mid ka mid ah Eedeysanayaasha lala xiriirinayo qaraxyaddii mataanaha ee ay Alshabaab ka geysteen caasimadda dalka Uganda ee Kampala sannadkii 2010-kii  ayaa sheegay in loogu hanjabay in surka laga jari doono, haddii uusan qarxinin bamkii labaad.
Idiris Nasubuge oo haatan ahaa Maxbuus lagu xukumay 25-sanno, kadib, markii uu qirtay inuu ku lug lahaa falalkii Is-qarxinta ayaa waxa uu haatan markhaati ka yahay dacwadaasi.
Waxa uu  hadalkaasi ka hor sheegay Maxkamadda Sare ee Kampala, isagoo tilmaamay in Eedeysanaha lagu magacaabo Ciise Luyima oo ka mid ah 13-ka Eedeysane ee u xiran kiiskaasi  ku cabsi geliyey inuu surka ka goyn doono, haddii uusan qarxin qarixii labaad oo lala beegsaday goob lagu daawanayey Finaalkii Ciyaartii K/cagta ee Koobka Adduunka.
Dhinaca kale, Idiris Nasubuge waxa uu Toddobaadkii hore ka hor sheegay Fadhiga Maxkamadda Sare inuu Eedeysane Ciise Luyima uu gurigiisa keenay Labadii qof ee isku qarxisay magaalladda Kampala sannadkii 2010-kii, oo ay ku geeriyoodeen 67 qof.
Wuxuuna intaasi ku daray inay Is-qarxiyayaasha ku sugnaayeen gurigiisa in ku dhow labo bilood, ka hor intaysan geysanin qaraxyadaasi.
Xigasho: Monitor