Iyadoo dhowr maalmood ka hor la shaaciyey in laba gabdhooda oo ka soo jeeda Soomaalida Kenya inay ku biireen Dagaalyahannadda Daacish, ayaa waxay Boliska shaki geliyeen arrintaasi.
Raad-raac lagu sameeyey farriimihii  SMS-ka ay  soo direen ayaa waxaa lagu  ogaaday in laga soo diray Xaafadda Pangani ee magaalladda Nairobi.
Boliska waxay tilmaameen inay weli gabdhahaasi ku sugan yihiin gudaha Kenya, oo aysan u dhoofin dalka Syria, sida ay horey gabdhahaasi ugu andacoodeen.
Sarkaal ka tirsan Dembi-baarista Kenya oo codsaday inaan magaciisa la soo xiganin ayaa u sheegay Wargeyska News24 inay weli rumeysan yihiin inay gabdhaha weli ku sugan yihiin Kenya.
Labada gabdhood ee horey loo shaaciyey inay ku biireen Daacish ayaa waxaa lagu kala magacaabaa Salwa Abdalla iyo Tawfiiqa Dahir, waxayna labadooda ahaayeen Arday dhigta Jaamacadda.
Mid ka mid ah Hooyooyinka dhalay gabdhahaasi oo lagu magacaabo Amina Dahir ayaa ku baaqday haddii ay weli ku sugan yihiin gudaha Kenya in la soo badbaadiyo, dibna loogu soo celiyo.
Xigasho: News24.com