Qoraal ka soo baxay Hay’adda QM ugu qaabilsan Daryeelka Carruurta ee UNICEF ayaa lagu sheegay in afar ka mid ah Shaqaalahooda ka mid ahaayeen dadkii ku geeriyooday qarixii maanta lala beegsaday Bas ay la socdeen oo marayey meel ku dhow Dhismaha QM ka deggan tahay magaalladda Garowe.
Qoraalka UNICEF waxaa kaloo lagu sheegay in afar ka mid ah shaqaalahooda ay dhaawacyo halis ah soo gaareen, kuwaasi oo dhaawacooda loo duuliyey magaalladda Nairobi.
Goobjoogayaal ayaa sheegay inay miino la kacday Baska QM, xilli uu ka yimid Aqalka Mratida, kuna sii jeeday Xafiiska QM ay ku leeyihiin Xaafadda Wadajir ee Koonfurta magaalladda Garowe.
Wasiirka Warfaafinta ee Maamulka Puntland, Abdiweli Hersi oo la hadlay Telefishinka Aljazeera ayaa sheegay in labo ka tirsan Ilaaladda Ammaanka ku geeriyoodeen Falka Is-qarxinta ee ka dhacay Garowe.
Wasiirka waxa kaloo  uu xusay in la garan la’ yahay haybta nin kale oo ku geeriyooday qaraxaasi.
Dhinaca kale, Ergayga Gaarka ee Xoghayaha Guud ee QM ugu qaabilsan Arrimaha Somalia, Nicholas Kay ayaa cambaareeyey qaraxaasi lala eegtay Xarunta QM ee magaalladda Garowe.
Nicholas Kay oo qoraal soo dhigay Bartiisa Twitterka, waxa uu sheegay inay ka argagaxay dadka ku geeriyooday qaraxaasi.
Xarakadda Alshabaab ayaa sheegay inay ka dambeeyeen Qaraxii ka dhacay Garowe, waxayna xuseen inay ku dileen, kuna dhaawaceen shaqaale ka tirsan QM, waa sida ay hadalka u dhigeen.
