Ilaa 700 oo qof oo Tahriibayaal ah ayaa laga cabsi qabaa inay ku maashoobeen dooni ku degtay meel ka baxsan Badda Libya oo qiyaastii 193 KM dhanka Koonfurta kaga toosan Jesiiradda Lampedusa ee dalka Talyaaniga.
Afhayeenadda Hay’adda QM ugu qaabilsan arrimaha Qaxootiga (UNHCR), Karalotta Saami ayaa u sheegtay Telefishinka Skytg 24 inay ka cabsi qabaan xaalladda Tahriibayaasha ay doonida la degtay.
Waxay intaasi ku dartay in 28 qof oo keliya laga badbaadiyey doonida degtay.
Warar Xog-ogaal ayaa sheegayo inay Tahriibayaasha hal dhinac u bateen, taasi oo keentay inay Doonida dhinac u liicdo, ka hor inta aysan qalibmin.
Ciiddanka Ilaaladda Xeebaha iyo Maraakiibta Dagaalka ee Talyaaniga ayaa ku hawlan sidii loogu gurman lahaa Tahriibayaasha.
Haddii la xaqiijiyo shilkaasi, waxa uu noqonayaa mid ka mid ah masiibadaha ugu xumaa ee tobaneeyo sanno ka dhacda Koonfurta Badda Mediterranean Sea, iyadoo tiradda guud ee sannadkan ku geeriyootay Badda u dhexeysa Libya iyo Talyaaniga gaarayso in ka badan 1,500 oo qof.
Dhinaca kale, Tahriibayaal ku dhow 13,000 oo qof ayaa toddobaadkii hore si nabad ah ku gaaray Xeebaha dalka Talyaaniga, kadib, markii ay Ilaaladda Xeebaha Talyaaniga u fidiyeen gurmad lagu soo badbaadiyey.