Abdullahi Mohamed Addow oo ka mid ah Soomaalida Qaxootinimadda ugu nool Jeziiradda Malta ayaa lagu xukumay xabsi 40-bilood ah, kadib, markii lagu helay inuu Xaggaagii hore dhac u geystay Nin u dhashay dalka Romania.
Warbaahinta Malta ayaa shaaciyey in Eedeysanaha oo 33-jir ah lagu helay inuu dhacay nin hurdayey, kana qaatay lacag dhan €40, Mobayl iyo Kaararka Lacagta ee Credit Cards.
Qoraal ay Boliska u soo gudbiyeen Garsoorka Maxkamadda ayaa lagu xusay in Eedeysane Abdullahi Mohamed Addow iyo saddex kale ay dhac nooca jeeb-siibka u geysteen nin u dhashay dalka Romania oo lagu magacaabo Bogdan-Marius Caimaru.
Dhinaca kale, Maxkamadda ayaa sheegtay in Eedeysanahaasi horey dhowr jeer loogu soo oogay falal la xiriira Xatooyo uu u geystay qaar ka mid ah Muhaajiriinta shisheeyaha ee ku sugan Malta.