Ra’iisul Wasaaraha Albania, Edi Rama, ayaa magacaabay wasiirka ugu horreeya adduunka ee uu dhalay Artificial Intelligence (AI), kaas oo loo magacaabay Diella. Wasiirkan dhijitaalka ah ayaa loo xilsaaray inuu kormeero dhammaan howlaha qandaraaska dawliga ah si uu uga dhigo kuwo 100% hufan oo aan musuqmaasuq lahayn. Tallaabadan ayaa ka dhigtay Albania dal ugu horreeya adduunka ee isticmaala AI heer wasiir si uu ula dagaallamo musuqmaasuqa.
Tallaabadan ayaa muhiim u ah sababtoo ah waxay ka dhigan tahay isku day cusub oo lagu doonayo in lagu hagaajiyo hufnaanta maamulka iyo la dagaallanka musuqmaasuqa iyadoo la adeegsanayo tignoolajiyadda casriga ah. Diella, oo ah haweeney lagu soo bandhigay dharka dhaqanka Albania, waxaa markii hore la sameeyay Janaayo 2025 si ay uga caawiso dadka adeegsiga rasmiga ah ee barta e-Albania iyadoo ilaa hadda soo saartay 36,600 dokumenti dhijitaal ah iyo ku dhawaad 1,000 adeeg.
Ra’iisul Wasaare Rama ayaa sheegay in Diella ay leedahay awood ay ku kormeerto dhammaan go’aannada qandaraaska dawliga ah isagoona ku tilmaamay inay suurtogelin doonto in lacagaha dawliga ah ay noqdaan kuwo 100% daah-furan. Waxa uu intaas ku daray: “Diella waa xubintii ugu horreysay ee aan jir ahaan u jirin balse ay sameysay Artificial Intelligence”. Wasiirka AI ayaa sidoo kale la sheegay inuu la hadlay baarlamaanka, isagoo sheegay: “khatarta dhabta ah ee dastuurka marna ma aha mashiinnada, balse waa go’aannada aan bini’aadamnimada lahayn ee kuwa xoogga haya”.
Si kastaba ha ahaatee magacaabista Diella waxay kicisay falcelinno kala duwan. Qaar ka mid ah khubarada ayaa ka digay in AI aysan ahayn xal sixir ah oo lagu xallin karo musuqmaasuqa iyadoo ay ugu wacan tahay in tignoolajiyadu ay tahay mid uun sida ay u wanaagsan yihiin dadka abuura oo maamula. Sidoo kale, waxaa jira welwel ku saabsan sida looga jawaabi doono su’aasha mas’uuliyadda marka go’aanno muhiim ah laga qaato nidaam AI ah, iyadoo ay jirtaan sidoo kale su’aalo ku saabsan waxqabadka dhabta ah ee Diella iyo haddii ay tahay mid wax ku ool ah. Dhanka kale hoggaamiyaha mucaaradka Sali Berisha, ayaa ku tilmaamay talaabadan mid aan dastuuri ahayn oo loogu talagalay inay soo jiito dareenka, isagoo sheegay inaysan suurtogal ahayn in lagu xakameeyo musuqmaasuqa iyada oo loo marayo Diella.
Dowladda Albania ayaa sii wadda dadaalladeeda ay kula dagaallamayso musuqmaasuqa, taasoo ah mid ka mid ah shuruudaha ugu muhiimsan ee ay uga midowdo Midowga Yurub.
