By Saleeymaan Alcadaala
Sports Reporter, Radio Dalsan TV
Maxkamadda ciyaaraha ee Brazil ayaa ganaax aan horay loo arag ku ridday daafaca kooxda Internacional, Victor Gabriel, kaddib dhaawac halis ah oo uu u geystay weeraryahanka Cruzeiro, Gabriel Pec. Go’aanka maxkamadda ayaa dhigaya in Victor Gabriel laga mamnuuco ka qeybgalka dhammaan tartamada rasmiga ah ilaa Gabriel Pec uu caafimaad ahaan u soo laabto tababarka, iyadoo xadka ugu badan uu yahay 180 maalmood.
Go’aankan ayaa muhiim u ah sababtoo ah waxa uu ka dhigan yahay ciqaab aan horay loogu arag kubadda cagta Brazil. Maxkamadda ayaa sheegtay in ganaaxyada caadiga ah ee u dhexeeya hal ilaa lix kulan aysan ka turjumeyn culayska dhaawaca . Sidaas awgeed, waxaa la go’aamiyay in la adeegsado Qodobka 254aad ee Xeerka Ciyaaraha Brazil, kaas oo ogolaanaya in muddada ciqaabtu la jaanqaado wakhtiga ay dhaawaca u baahan tahay.
Gabriel Pec, oo 25 jir ah, waxa uu lahaa kulankiisii ugu horreeyay Cruzeiro kadib markii uu kaga soo biiray LA Galaxy lacag dhan $12 milyan . Dhaawaca ayaa ku yimid 13 daqiiqo kadib intii uu ciyaarta ka soo galay, waxaana lagu ogaaday inuu ka dhacay lugtiisa bidix. Waxaa la filayaa inuu ka maqnaado 3 ilaa 4 bilood.
Victor Gabriel, oo 22 jir ah, ayaa maxkamadda kaga hadlay dhacdada, isagoo sheegay inuusan u jeedin inuu dhaawaco Pec. Wuxuu yidhi: “Waxaan soo dhaafay habeeno aan hurdayn anigoo u duceynaya, waxaanan si qalbiga ah ugu raali-gelinayaa dhamaan taageerayaasha Cruzeiro” . Wuxuu kaloo sheegay inuu uu raaliga ka yahay, isla markaana uusan u jeedin wax xumaato ah.
Go’aanka maxkamadda ayaa kala qaybiyay garsoorayaasha, iyadoo mid ka mid ah u codeeyay ganaax caadi ah oo lix kulan ah, laakiin inta badan waxay ku wada oggolaadeen ganaaxa dheer. Kooxda Internacional ayaa sidoo kale soo bandhigtay caddayn been abuur ah oo ah duubis VAR ah, taasoo ay markii dambe ka baxeen.
