Jaamacadda Ummadda Soomaaliyeed oo Daahfurtay Xarunta Garaad Gacmeedka Ummadda
Muqdisho – Jaamacadda Ummadda Soomaaliyeed (JUS) ayaa maanta si rasmi ah u daahfurtay Xarunta Garaad Gacmeedka Ummadda (SNAIC), oo ah xarun loogu talagalay horumarinta cilmi-baarista, waxbarashada, hal-abuurka iyo dhisidda awoodda aqooneed ee Garaad Gacmeedka . Munaasabadda daahfurka waxaa ka soo qayb galay mas’uuliyiin ka socday hay’adaha dowladda, jaamacadaha dalka, khubaro dhanka teknolojiyadda iyo Garaad Gacmeedka ah.
Daahfurkan ayaa muhiim u ah xilligan, sababtoo ah waxa uu ka dhigan yahay tallaabo cusub oo Soomaaliya uga sii dhowaanayso isbeddelka dhijitaalka ah iyo adeegsiga teknolojiyadda casriga ah, iyadoo Garaad Gacmeedku uu noqday mid ka mid ah teknolojiyadaha ugu muhiimsan ee dunida hadda lagu horumariyo dhaqaalaha, waxbarashada, caafimaadka iyo maamulka .
Xaruntu waxay noqon doontaa xarunta hormuudka u ah Jaamacadda ee horumarinta Garaad Gacmeedka, iyadoo taageeraysa horumarinta xalal maxalli ah oo ka qayb qaadanaya horumarka qaranka. Waxay diiradda saari doontaa horumarinta cilmi-baarista, kobcinta tayada khubarada Soomaaliyeed, taageeridda hal-abuurka, ka qayb qaadashada dejinta siyaasadaha iyo hannaanka maamul ee Garaad Gacmeedka .
Waxay hawlaheeda ku salayn doontaa dhinacyada muhiimka ah ee cilmi-baarista, oo ay ka mid yihiin isbarid mashiinnada, habaynta afafka dabiiciga ah, cilmiga xogta, aragga kombiyuutarka, robotiyada, iyo anshaxa Garaad Gacmeedka. Khubaro ka tirsan Jaamacadda Ummadda ayaa si gaar ah ugu xeel dheer habaynta afka Soomaaliga iyo codka, kuwaas oo qayb muhiim ka ah horumarinta Garaad Gacmeedka .
Xaruntu waxay sidoo kale bixin doontaa barnaamijyo tacliimeed, tababbarro xirfadeed, hindiseyaal cilmi-baaris iyo hawlo hal-abuur oo loogu talagalay in lagu kobciyo aqoonta iyo xirfadaha ardayda, cilmi-baarayaasha iyo xirfadlayaasha. Waxay si gaar ah diiradda u saari doontaa kor u qaadista adeegsiga teknolojiyaddan ee waxbarashada, caafimaadka, beeraha, maamulka iyo koboca dhaqaalaha.
Qorshayaasha SNAIC waxaa ka mid ah tababbarro gaagaaban oo Garaad Gacmeedka ah, barnaamijyo shahaado iyo diploma, iyo iskaashi lala yeesho jaamacadaha si loo horumariyo manhajka Garaad Gacmeedka heerka jaamacadeed . Sidoo kale, waxaa la filayaa in xaruntu ay taageerto ganacsatada iyo hal-abuurayaasha Soomaaliyeed iyadoo siinaysa fursado ay ku abuuraan shirkado iyo xalal Garaad Gacmeed ku dhisan .
Munaasabadda daahfurka waxaa ka soo qayb galay mas’uuliyiin ka socday qaar kamid ah hay’adaha dowladda, jaamacadaha dalka, bahda tacliinta sare, khubaro dhanka teknoolojiyadda iyo Garaad Gacmeedka ah, iyo daneeyayaal kale.
